Nám við barna- og unglingadeild fer fram á námskeiðum og er skipulagt með hliðsjón af markmiðum aðalnámskrár grunnskóla. Allt annað nám sem fram fer við Myndlistaskólann í Reykjavík tekur mið af aðalnámskrá framhaldsskóla frá 2011 en það er skilgreint á framhaldsskólastigi og er metið til framhaldsskólaeininga þegar það á við.

Námslok á listnámsbraut til stúdentsprófs eru á 3. hæfniþrepi. Samsetning námsins er í samræmi við kröfur aðalnámskrár framhaldsskóla frá 2011 um nám til stúdentsprófs og tekur brautin mið af því að nemandinn geti lokið stúdentsprófi með þriggja ára námi. Áður en nám við skólann hefst þurfa umsækjendur að hafa lokið að lágmarki 60 einingum við annan framhaldsskóla, í kjarnagreinum og valgreinum, öðrum en þeim sem kenndar eru við skólann. Gert er ráð fyrir að stór hluti þess náms sem nemandinn lýkur við annan skóla sé á 1. og 2. þrepi. Við Myndlistaskólann tekur nemandinn 140 einingar á tveimur árum, 35 á hverri önn. Af þeim 140 einingum sem kenndar eru við skólann eru 25 á 1. þrepi, 52 á 2. þrepi, 57 á 3. þrepi og 6 á 4. þrepi, lokaverkefni nemenda ásamt meðfylgjandi greinargerð.

Eins árs fornám er 60 eininga nám á 3. þrepi, ætlað nemendum sem lokið hafa stúdentsprófi af annarri braut en listnámsbraut, sem samanstendur af völdum verklegum áföngum af listnámsbrautinni, auk listasögu. 30 eininga fornám fyrir nemendur sem lokið hafa starfsbraut tekur sömuleiðis mið af áföngum á listnámsbraut en er skilgreint með námslok á 1. hæfniþrepi. Þó má gera ráð fyrir að nemendur nái mislangt í sínu námi enda er námið mjög einstaklingsmiðað. Fornám fer ekki fram skv. staðfestri braut en að loknu námi fá nemendur skírteini með yfirliti yfir lokna námsáfanga og niðurstöður þeirra.

Nám á keramikbraut, listmálarabraut, teiknibraut og textílbraut er skilgreint sem viðbótarnám við framhaldsskóla með námslok á 4. hæfniþrepi (sbr. 20. gr. laga um framhaldsskóla nr. 92/2008. 4 hæfniþrep skv. íslenska hæfnirammanum samsvarar 5. hæfniþrepi skv. EQF, Evrópska hæfnirammanum). Viðbótarnámið er upphaflega skipulagt í víðtæku samstarfi, m.a. við marga erlenda listaháskóla, sem 120 ECTS eininga nám (samsvarar tveggja ára námi á háskólastigi). Við útskrift af braut fá nemendur skírteini með yfirliti yfir nám og árangur. Að loknu námi við skólann geta nemendur sótt um áframhaldandi nám á háskólastigi við aðra skóla og er viðtökuskóla þá heimilt að meta nám á þessu skólastigi til háskólaeininga eða leggja hæfnipróf fyrir nemendur til að staðsetja þá í námi hjá sér. Fái nemendur inngöngu í einn af samstarfsháskólum Myndlistaskólans erlendis er nám þeirra ýmist metið til hálfs eða fulls skv. samningi.

Áfangar námskeiðaskóla fyrir fullorðið fólk taka sömuleiðis mið af aðalnámskrá framhaldsskóla frá 2011 en almenningur hefur kost á að sækja fjölda námskeiða sem samsvara áföngum af staðfestum námsbrautum skólans. Einnig er í námskeiðaskóla boðið upp á fjölda áfanga sem ekki eru kenndir í dagskóla. Námskeið fyrir almenning eru flest skilgreind á 1. og 2. þrepi. Nemandi sem stenst kröfur áfanga fær við lok námskeiðs rafrænt skjal um niðurstöðu námskeiðs og einingar í samræmi við tímafjölda.