Nám við skólann, sem skilgreint er á framhaldsskólastigi, er metið til framhaldsskólaeininga en á bakvið hverja einingu er 18-24 klst vinnuframlag nemandans. Viðbótarnám við skólann var upphaflega skipulagt sem áfanganám á BA-stigi og metið í ECTS-einingum. Miðað er við 25-30 klst vinnuframlag nemandans á bakvið hverja einingu í viðbótarnámi.

Nám í barna- og unglingadeild fer fram á frístundanámskeiðum sem kennd eru utan hefðbundins skólatíma og eru skipulögð í samræmi við kröfur í aðalnámskrá leik- og grunnskóla. Námskeið á framhaldsskólastigi, fyrir 16 ára og eldri, fara flest fram utan skólatíma en þó eru yfirleitt nokkur námskeið skipulögð á morgnana og um miðjan dag. Nám í námskeiðaskóla fer nánast eingöngu fram í kennslustundum.

Kennsla á staðfestum brautum skólans og í fornámi fyrir nemendur með stúdentspróf fer fram milli kl. 8:30 og 15:00 á virkum dögum en fornám fyrir nemendur af starfsbraut fer fram alla virka morgna. Hluti af námsvinnu nemenda dagskóla fer fram utan formlegs kennslutíma, ýmist sem sjálfstæð vinna nemandans í skólanum eða sem heimavinna. Heimavinna getur verið bókleg jafnt sem verkleg.

Verklegt listnám í dagskóla fer fram í verknámsstofum eða á verkstæðum og er kennt í lotum.

Bóklegt nám við skólann fer fram í bóknámsstofum eða fyrirlestrastofum og er ýmist kennt í lotum eða í vikulegum kennslustundum yfir heila önn.

Verkefni í bóklegum áföngum eru ýmist skrifleg eða verkleg en bóklegir áfangar eru tengdir verklegu námi nemandans þannig að inn í bóknám er fléttað verklegum verkefnum. Nám í íslensku, ensku og stærðfræði á listnámsbraut tekur sérstakt mið af myndlist og hönnun og sjónræn miðlun er mikilvægur þáttur í verkefnavinnu nemenda. T.d. er stærðfræði að hluta kennd í lotu samhliða áfanga í formfræði og hluti íslenskunáms er kennt samhliða áfanga í teikningu. Því fer hluti af vinnu nemandans í bóklegum áföngum fram í verknámsstofum.

Bóklegt nám fer fram með fjölbreyttum hætti en rík áhersla er lögð á samtal og samvinnu, lausnaleit og frjóa vinnu nemandans.