Skv. 40. gr. laga um framhaldsskóla nr. 92/2008 ber skólum að viðhafa innra mat á gæðum og árangri starfsins. Í reglugerð um mat og eftirlit í framhaldsskólum nr. 700/2010 segir að innra mat skuli samofið annarri starfsemi skólans, matið skuli vera umbótamiðað og ná til allra helstu þátta skólastarfsins.

Stjórn skólans, starfsfólk, foreldrar og nemendur taka þátt í innra mati, eftir því sem við á. Stefnt er að því að leita lausna og ráðast í úrbætur svo hratt sem mögulegt er. Matsskýrslur eru birtar á vef skólans.

Sjálfsmat skólans er með eftirtöldum hætti:

1. Könnun á kennsluaðferðum og námsefni. Matið fer fram í lok hverrar annar með netkönnun sem nemendur eða forráðafólk barna á námskeiðum eru beðnir að svara. Niðurstöðurnar eru yfirfarnar af yfirkennara/deildarstjóra og birtar kennara og skólameistara ef tilefni er til. Sé þess þörf eru gerðar umbætur.

2. Könnun á annarri þjónustu og starfsemi eins og stjórnun, ráðgjöf, bókasafni, tölvuveri og tækjakosti. Matið fer fram með formlegum hætti í netkönnun sem sem nemendur eru beðnir að svara. Niðurstöðurnar eru yfirfarnar af stjórnendum og birtar viðkomandi starfsfólki ef tilefni er til. Sé þess þörf eru gerðar umbætur.

3. Könnun á viðhorfum nemenda dagskólans til skólastarfsins í heild. Mat nemenda kemur annars vegar fram í árlegri fundaröð skólameistara sem hann boðar til á haustönn með öllum hópum í fullu námi. Hinsvegar á árlegum skólafundi sem boðað er til á vorönn en til hans er boðið öllum nemendum í dagskóla, starfsfólki, kennurum og foreldrum ólögráða nemenda ef við á. Niðurstöðurnar þessara matsfundana eru yfirfarnar af starfsfólki skólans og fundargerðir birtar á vefsíðu skólans. Sé þess þörf eru gerðar umbætur.

4. Spurningalisti er sendur til útskrifaðra nemenda úr fullu námi við skólann eftir að námi lýkur í þeim tilgangi að kanna framvindu náms þeirra og gæði námsins við Myndlistaskólann. Niðurstöðurnar eru yfirfarnar af stjórnendum skólans sem meta hvort ástæða sé til breytinga.