Einelti, áreitni og ofbeldi er ekki liðið í Myndlistaskólanum í Reykjavík. Allir nemendur og starfsmenn við skólann eiga rétt á að komið sé fram við þá af virðingu og enginn á að þurfa að þola ofbeldi af neinu tagi, hvorki líkamlegt né andlegt, kynbundið né kynferðislegt. Sama gildir um hvers kyns áreitni og einelti.

Samkvæmt reglugerð er einelti skilgreint sem endurtekin ámælisverð háttsemi af hálfu eins eða fleiri saman, þ.e. hegðun, athöfn eða athafnaleysi, sem er til þess fallin að meiða, niðurlægja, gera lítið úr, móðga, særa, mismuna, ógna eða valda vanlíðan hjá þeim sem háttsemin beinist að. Þetta á einnig við um skilaboð eða aðrar upplýsingar sem miðlað er í síma eða með rafrænum hætti. Hér er þó almennt ekki átt við samskipti eða skoðanaskipti milli jafningja.

Ef einhver telur sig verða fyrir ofbeldi, áreitni eða einelti innan skólans ber að tilkynna stjórnendum um málið hið fyrsta. Rétt er að snúa sér til skólameistara, yfirkennara eða náms- og starfsráðgjafa. Leitað verður sátta eftir bestu getu en ef grunur er um alvarlegt brot skal málið sett í lögformlegan farveg

Ef einhver verður vitni að eða fær vitneskju um einelti eða áreitni eða ofbeldi innan skólans skal viðkomandi tafarlaust upplýsa skólameistara, yfirkennara eða náms- og starfsráðgjafa um það. Viðkomandi þarf að vera reiðubúinn að skýra mál sitt nánar ef ástæða þykir til. Stjórnendur skólans bregst við eins fljótt og kostur er. Einu gildir hvort um ræðir ofbeldi, áreitni eða einelti gagnvart nemanda, starfsmanni eða stjórnanda. Ásakanir um einelti, áreitni eða ofbeldi eru ávallt teknar alvarlega. Svo fljótt sem mögulegt er skal leita eftir frekari upplýsingum til að grafast fyrir um hvort ásakanir um einelti, áreitni eða ofbeldi eigi við rök að styðjast. Ef þörf krefur er leitað utanaðkomandi ráðgjafar. Ávallt er leitast við að hafa sanngirni og óhlutdrægni að leiðarljósi. Gripið er til viðeigandi ráðstafana til að stöðva hið ólíðandi atferli sem fyrst. Rætt er við málsaðila einslega og í þeim tilvikum þar sem nemandi er yngri en 18 ára er einnig rætt við forráðamenn. Allir aðilar máls eiga kost á að ræða við námsráðgjafa. Farsæl lausn málsins byggir á rannsóknarferlinu sjálfu. Þar sem áreitni eða ofbeldi snúast um samskipti er mikilvægt að aðilar málsins komi sjálfir með hugmyndir að lausn vandans sem tekið verður tillit til við úrlausn mála.

Þessi stefna skólans er kynnt öllum nemendahópum í dagskóla þegar náms- og starfsráðgjafi kynnir þjónustu sína, strax í upphafi skólaárs. Þar er sérstaklega tekið fram að kynbundið ofbeldi, kynbundin áreitni eða kynferðisleg áreitni sé litin mjög alvarlegum augum innan skólans.