Þegar nemendur eru innritaðir í barna- og unglingadeild er óskað eftir því að forráðamenn upplýsi skólann um sérþarfir nemanda séu þær fyrir hendi. Kennari eða deildarstjóri hafa þá samband við forráðamenn og fá frekari upplýsingar um hvernig best megi aðstoða nemandann svo árangur náist í náminu. Nemendahópar eru litlir til þess að tryggja að kennarinn geti sinnt öllum vel þannig að hver og einn nemandi fái að njóta sín í náminu. Nemendafjöldi er á bilinu 6-12 eftir aldri hópsins.

Á námskeiðum fyrir fullorðna er þess sömuleiðis gætt að hópar séu ekki of stórir til þess að kennarinn geti sinnt öllum nemendum vel. Yfirleitt miðast hámarksfjöldi við 12 nemendur.

Í dagskóla starfa yfirkennarar við hverja braut. Meðal mikilvægra verkefna þeirra er að halda utan um nemendahópinn með það fyrir augum að öllum líði sem best. Hámarksfjöldi í hóp í viðbótarnámi er á bilinu 12-16 en á listnámsbraut miðast hámarkið við 16-18 nemendur, nema í fornámi fyrir nemendur af starfsbraut en þar miðast hámarkið við 6 nemendur. Þess er gætt að hópurinn sem kennir nemendum af starfsbraut sé lítill og þéttur svo nemendur og kennarar kynnist vel. Nemendur sem þurfa sérstakan stuðning koma með stuðningsfólk með sér.

Náms- og starfsráðgjafi skólans kynnir sig og þjónustu sína fyrir öllum hópum í dagskóla og hvetur nemendur til að hafa samband ef þörf er á.

Náms- og starfsráðgjafi vinnur náið með yfirkennara og nemendum á listnámsbraut til stúdentsprófs. Allir nemendur á brautinni eru boðaðir í viðtal við upphaf náms og samband er haft við forráðamenn nemenda sem ekki hafa náð 18 ára aldri. Farið er ítarlega yfir námsferil hvers og eins og vandlega hugað að sérþörfum ef einhverjar eru. Nemendur eru hvattir til að láta vita ef eitthvað kemur upp á sem hamlað getur námi þeirra. Yfirkennari og náms- og starfsráðgjafi annast í sameiningu lífsleikniáfanga sem nemendur á listnámsbraut til stúdentsprófs eru í allan námstímann við skólann.