Listnámsbraut er tveggja ára nám til stúdentsprófs fyrir fólk sem hyggur á frekara nám í listgreinum eða störf á sviði skapandi greina.

Námið er að mestu verklegt og byggir á klassískum grunnáföngum myndlistar, ásamt hugmyndavinnu og listasögu. Áhersla er lögð á tæknilega færni, skilning á sögulegu samhengi og sjálfstæði nemandans í hugmyndavinnu og útfærslu.

Nám í bóklegum greinum á borð við íslensku, ensku og stærðfræði tekur mið af myndlist og hönnun og sjónræn miðlun er mikilvægur þáttur í verkefnavinnu nemenda.

Verklegir áfangar eru flestir kenndir í samfelldum lotum. Þegar nemendur hafa náð valdi á viðfangsefni áfanga vinna þeir sjálfstætt verkefni. Lifandi samræða um verkefni nemenda er ríkur þáttur í öllum verklegum áföngum.

Meðal þess sem nemendur fást við á brautinni er teikning, módelteikning, lita- og formfræði, ljósmyndun, vídeó, myndvinnsla í tölvu, bókagerð og verkstæðisvinna af ýmsu tagi. Náminu lýkur með sjálfstæðu lokaverkefni sem sýnt er á vorsýningu skólans.

Námsbrautin er fjögurra anna nám og telur samtals 140 einingar, eða 35 einingar á hverri önn. Til að hefja nám á brautinni þarf nemandi að hafa lokið að lágmarki 60 einingum úr öðru framhaldsskólanámi (sjá inntökuskilyrði hér að neðan). Til útskriftar með stúdentspróf af listnámsbraut þarf nemandi að hafa lokið samtals að minnsta kosti 200 einingum.

Skylduáfangar brautarinnar – ítarlegar lýsingar

• Fyrra ár: 1. önn
• Fyrra ár: 2. önn
• Seinna ár: 3. önn
• Seinna ár: 4. önn

Upplýsingar um listnámbraut á vef mennta- og barnamálaráðuneytisins

Sjá námsgjöld fyrir skólaárið 2026-27.

Umsækjendur skulu hafa lokið að minnsta kosti 60 einingum við annan framhaldsskóla, sem hér segir:

• 10 einingar á 2. þrepi í íslensku,
• 10 einingar á 2. þrepi í ensku,
• 5 einingar á 2. þrepi í dönsku,
• 5 einingar á 2. þrepi í stærðfræði,
• 30 valeiningar í tungumálum, hugvísindum og raungreinum.

Nemendur þurfa að eiga eða hafa aðgang að fartölvu til að geta stundað nám við skólann. Æskilegt er að tölvan sé með 16 GB vinnsluminni. Einnig er gott að hafa aðgang að ljósmyndavél fyrir 35 mm filmu.

Listnámsbraut á Instagram