Tíu nemendur keramikdeildar Myndlistarskólans í Reykjavík sýna verk sín í gluggum Gallerí Fold. Verkin spretta úr þema Hönnunarmars, Tengingar, og eru mótuð af spurningum um tengsl – þau sem sjást, þau sem finnast og þau sem lifa í minningum.

Með leirinn sem sameiginlegt tungumál leita þær að tengingum í hinu daglega og hinu djúpa: í matnum sem færir okkur saman, í handverkinu sem heldur utan um sorg, í efniviðnum sem ber í sér minni og mótstöðu. Hér verða samskeyti og samsetningar bæði líkamleg og huglæg.

Nemendurnir setja sig í spor náttúrunnar, leirsins sjálfs, dýranna sinna, forfeðra og eigin sjálfs. Þær teygja sig í allar áttir – aftur í tímann, inn á við og út í heiminn – í leit að tengingum sem móta okkur. Verkin voru unnin í áfanga í gifsmótun undir leiðsögn Jens Pfotenhauer.

Sýningin Mótaðar tengingar opnar fimmtudaginn 7. maí, samhliða opnun vorsýningar skólans sem verður sett upp á Rauðarstíg 10.

Mótaðar tengingar

• Sýningargluggar Gallerí Fold, Rauðarárstígur 12. Upplýsingar um viðburðinn á Facebook
• Dagskrá HönnunarMars
• Fylgdu Keramik MÍR á Instagram