Næði táknar þá stöðugu og oft ósýnilegu baráttu sem margir lifa með, sérstaklega fólk
sem upplifir geðrofseinkenni eins og skynjunartruflanir. Hugmyndin byggist á
röddunum og hvernig áreiti getur veitt tímabundið skjól frá þeim. Fólk notar
mismunandi aðferðir til þess að bregðast við röddunum, sumir nota aðferðir til að
draga úr þeim áhrifum, aðrir ekki.
Verkið sýnir eina slíka leið og einkennist af miklu áreiti. Sjónvarp og útvarp í gangi
samtímis, ABC News í sjónvarpinu, á meðan Lindin hljómar í bakgrunni skapar
ákveðna truflun. Þegar áhorfandi fær sér sæti í stólinn, breytist upplifunin þar sem
hátalarar innbyggðir í stólinn spila hljóðverk sem á að líkjast þeirri upplifun að heyra
raddir.
Verkið einkennist af mikilli óreiðu, bjórdósir, nammibréf, sígarettustubbar og tuggðar
karamellur. Þessi óreiða á að tákna upplifun sumra af þeim áskorunum sem geta fylgt
geðrofseinkennum.
Verkið leggur áherslu á þessa ósýnilegu glímu og leiðir áhorfandann inn í heim þar
sem röddunum tekst að yfirgnæfa þá aðferð sem notuð er til þess að komast undan
þeim.
Næði er sett fram af virðingu og er ætlað til þess að vekja samkennd og auka skilning
á þeim áskorunum sem fylgja geðrænum vandamálum.
