Á námskeiðinu er samspil texta og mynda kannað með fjölbreyttum skrifæfingum þar sem forvitni og leikgleði eru höfð að leiðarljósi. Nemendur öðlast færni í að mynda hugrenningartengsl með ýmsum aðferðum þar sem hið ófyrirséða fær að njóta sín. Áherslan hvílir á samþættingu orða og mynda og þær margslungnu og litríku tengingar sem myndast þegar miðlarnir mætast á óvæntu stefnumóti.

Námskeiðið er byggt upp með innlögnum kennara, samræðum og æfingum sem skiptast á milli tíma. Kennari kynnir myndefni og texta jafnóðum sem verða kveikjur fyrir hvert verkefni sem ávallt er unnið á staðnum. Áhersla er lögð á ólíkar aðferðir og vinnubrögð við úrlausnir verkefna. Í lok námskeiðs vinna nemendur bókverk sem varpa ljósi á uppgötvanir tímabilsins.

Kennarinn er myndlistarmaður og rithöfundur, Haraldur Jónsson. Hann hefur um árabil leitt ritsmiðjur og námskeið í skapandi skrifum við Myndlistaskólann í Reykjavík, Listaháskóla Íslands og Háskóla Íslands.

Námskeiðið er í 8 vikur.