Námskeiðið kynnir fyrir nemendum mismunandi nálgun og tækni við olíumálun í realiskum anda.

Farið er yfir ýmsa grunntækni eins og íblöndunarefni (terpentínu og olíur, („fat over lean“ regla) litapallettu (æskilegir grunnlitir til að hafa) og litablandanir.

Undirmálverk og tilgangur þess, hvaða litir henta í það og mismunandi útgáfur af því. Skoðað hvernig maður heldur áfram með liti ofan á undirmálverk.

Hvernig hægt er að nýta akrýl-liti í undirmálverk til að byrja að byggja upp málverkið áður en skipt er yfir í olíu.

Mismunandi nálganir við að mála, „layer over layer“ (lag ofan á lag) á móti „alla prima“(blautt í blautt).

Mismunandi leiðir til að teikna viðfangsefni áður en byrjað er að mála, (teikna með kolum, blýanti eða „teikna“ beint með pensli og olíulit) og hvernig við getum notað grindaraðferð við flóknari teikningu. Ennfremur hvernig við getum fullklárað teikningu á blaði og fært svo yfir á striga.

Hvernig við vinnum út frá fyrirmynd t.d. við að gera flókið málverk gæti þurft að stilla hlutum upp til að vinna eftir og mögulega blanda saman við ljósmynd, meta hvað skiptir máli og hverju má sleppa, og jafnvel að hagnýta sér snjalltæki til að setja saman fyrirmyndina áður en málað er.

Verkefni námskeiðisins taka mið af því að kanna þessar mismunandi nálganir.

Námskeiðið er 12 vikur.