Nám

Myndlistaskólinn í Reykjavík var stofnaður árið 1947 og hefur starfað óslitið síðan. Tilgangur með stofnun skólans var að búa til vettvang þar sem almenningur ætti kost á kennslu í myndlist. Auk þess hefur starfsemi skólans gefið starfandi listamönnum kost á launaðri vinnu á sínu sérsviði. Lengst af var eingöngu hægt að sækja stök námskeið við skólann og voru þau í boði bæði fyrir börn og fullorðna nemendur. Nemendafjöldi tók gjarnan mið af því rými sem skólinn hafði til afnota og t.d. varð gríðarleg fjölgun þegar flutt var úr Ásmundarsal upp á Hlemm. 

Með upptöku áfangakerfis innan framhaldsskólans opnaðist möguleiki fyrir nemendur annarra skóla að fá nám við Myndlistaskólann metið inn í annað nám. Þegar Myndlista- og handíðaskóli Íslands var lagður niður og Listaháskóli Íslands stofnaður skapaðist þörf fyrir markvisst undirbúningsnám fyrir háskólanám í myndlist og hönnun. Myndlistaskólinn stofnaði þá fornámsdeild og í fyrsta sinn árið 2001 var boðið upp á samfellt nám við skólann.

Í dag eru alls sex námsleiðir í boði í dagskóla en jafnframt er boðið upp á fjölbreytt námskeið fyrir börn, unglinga og fullorðna nemendur. Sjöunda námsleiðin, 20 eininga nám í myndlist fyrir nemendur sem lokið hafa starfsbraut framhaldsskóla var sett saman með styrk frá menntamálaráðuneytinu og kennd til reynslu árin 2015-17 með stuðningi frá Fjölmennt. Vonir standa til þess að hægt verði að bjóða upp á slíkt nám að nýju.