09.04.18
Ný námskeið í apríl og maí

Helgina 14. - 15. apríl verður Kolbeinn Hugi, myndlistamaður, með námskeið í myndbandagerð. 

Þátttakendur munu læra grunnatriði videoforritsins Adobe Premiere.

Unnið verður með hljóð og videoefni fundið á netinu og það "remixað" til þess að búa til sjálfstætt video, eitt eða fleiri.
Ef nemendur vilja vinna með eigið efni er þeim frjálst að mæta með eigið videoefni og vinna með það.

Farið verður í helstu atriði:
- Klippingu myndefnis
- Grunn hljóðvinnslu
- Grunn samsetningu (compositing) og hvernig vinna má með efni sem skotið er fyrir framan greenscreen
- Þjöppun og hvernig er best að flytja efnið út úr forritinu til notkunar


Kennt verður á laugardeginum 14. apríl og sunnudeginum 15. apríl frá kl. 10:15-14:30.


Dagana 22.-25. maí verður Kristín Gunnlaugsdóttir með 4 daga námskeið í módelteikningu.

Á námskeiðinu verður lögð aðaláhersla á mismunandi efni, aðferðir og tækni við að teikna módel. Notast er við blýant og kol til að nefna. 

Sýnd verða dæmi úr listasögunni og úr myndskreyttum bókum. 

Módeli verður stillt upp í mislangan tíma sem ræðst aðallega af efnisnotkuninni hverju sinni. Bæði verða teiknaðar langar stöður og hraðskissur. Einnig glímt við hreyfingu og stundum verður skuggi og birta viðfangsefni í teikningunni. 

Námskeiðið hentar bæði byrjendum og þeim sem eru lengra komnir.

Námskeiðið er kennt frá þriðjudegi til föstudags frá klukkan 17:45-20:30.


Síðast en ekki síst verður Sigtryggur Bjarni með vatnslitanámskeið dagana 25.-28. maí.

Á námskeiðinu er ætlunin að vinna með vatnslitinn á skapandi og ögrandi hátt, vinna bæði smátt og fínlega, stórt og gróft. 

Þema námskeiðsins er fjallið Skjaldbreiður. Velt verður fyrir sér fjarskafallegum fjallablámanum sem er Íslendingum svo kær að uppistaða þjóðfánans er einmitt sá sami blái litur eða fyrirbrigði. 

Velt verður fyrir sér hvað það er að mála fjall. Er það náttúruskoðun, jarfræðileg rannsókn, heiðið ritual, trúarleg athöfn, dund og dúllerí, sjálfsskoðun (hver er ég starandi á þetta fjall?) eða sitt lítið af hverju?

Farið verður í vettvangsferð þar sem Skjaldbreiður verður skoðaður úr fjarska og í nánd, frá ýmsum sjónarhornum. Teknar verða myndir, skissað, snert og jafnvel örlítið af fjallinu tekið með heim til að vinna með. 

Um er að ræða fjögra daga námsskeið sem nær yfir helgi. Kennt verður á föstudegi frá kl. 16:30-20:30 og frá kl. 10:00-18:00 á laugardegi, sunnudegi og mánudegi.