Á þessu námskeiði verður unnið með ýmsar ólíkar aðferðir í teikningu og málun, bæði hefðbundnar og nýstárlegar og gerðar tilraunir með blandaða tækni. Farið verður í litafræði, myndbyggingu, hugmyndavinnu og skissugerð og við nýtum mismunandi tækni, efni og verkfæri. Við gerum ýmsar æfingar sem miða sérstaklega að því að auka færni í teikningu og efnismeðferð. Samhliða skoðum við líka listasöguna til að auka skilning á þróun myndlistar og til innblásturs. Unnið verður með vatnsliti, akrílliti, blek og önnur efni. Áhersla verður lögð á að veita nemendum svigrúm til tilrauna, virkja áhugasvið þeirra og sköpunargleði.