Textíll

Textílbraut er tveggja ára nám þar sem þú kynnist öllum helstu aðferðum og tækni í textílvinnu og öðlast fræðilega fagþekkingu. Áhersla er lögð á tæknilega færni og sjálfstæði nemandans í hugmyndavinnu og útfærslu.

Hér er hægt að sjá kynningarmyndband fyrir textílbraut.

Textílbraut er einnig á Instagram.

Inntökuskilyrði er stúdentspróf af listnámsbraut eða sambærilegt nám. Auk þess skila umsækjendur inn skissubókum og möppu með sýnishornum af eigin verkum.

Námið hentar fólki með áhuga á tísku, myndlist, innanhússtextíl og umhverfisvænum og sjálfbærum aðferðum. Tilvalið fyrir fólk sem vill bæta við sig þekkingu og færni í textíl. Góður grunnur fyrir frekara nám í hönnun eða myndlist.

Einungis einn hópur er við nám í hverri grein á hverjum tíma. Nýir nemendur eru þar af leiðandi fyrst og fremst teknir inn annað hvert ár. Áhugasömum er þó bent á að hafa samband við deildarstjóra sem annast viðkomandi námsbraut sem skoðar hvert einstakt tilvik í ljósi fyrra náms og reynslu.

Nám á brautinni er að stærstum hluta verklegt en fræðilegt nám er u.þ.b. fjórðungur. Nemendur læra fjölbreyttar vinnuaðferðir í textíl svo sem silkiþrykk, hand- og vélprjón, vefnað, spuna, jurtalitun, munsturgerð og útsaum.

Til fræðilegra áfanga teljast fagsaga, hönnunarsaga, listasaga og heimspeki auk viðskiptaáfanga og málstofu. Málstofa er vettvangur fyrir margvíslega umræðu þar sem textílheimurinn er skoðaður í stærra sögulegu samhengi og víðara ljósi. Farið er á söfn og sýningar, í heimsóknir á vinnustofur eða fyrirtæki og fyrirlesarar úr atvinnulífinu fengnir í heimsókn.

Einn af áföngum textílbrautar er námsferð til Evrópu þar sem nemendur kynnast ýmsum náms- og starfsmöguleikum. Ferðirnar eru styrktar af Erasmus+ menntaáætlun Evrópusambandsins.

Verklegir áfangar eru flestir kenndir í samfelldum lotum. Lifandi samræða um verkefni nemenda er ríkur þáttur í öllum verklegum áföngum. Áhersla er lögð á samvinnu og skólinn útvegar nemendum gjarnan raunveruleg verkefni sem byggja á samstarfi við einstaklinga utan skólans, fyrirtæki og stofnanir.

Nám á textílbraut er 120 einingar. Unnið er með ákveðna grunnþætti á hverri önn um sig; sögulegt samhengi, mynstur og áferð, framleiðslu og umhverfisvitund og persónulega stefnu. Viðfangsefnið er skoðað frá ýmsum sjónarhornum og tilraunir gerðar með nýjar leiðir. Fræðimenn og fagfólk er fengið til að varpa ólíku ljósi á námsefnið.

Nánari upplýsingar um nám á textílbraut má finna í námsbrautarlýsingu.

Deildarstjóri textílbrautar er Lilý Erla Adamsdóttir.

Skólagjöld fyrir námsárið 2021-2022 eru 460.000,- kr.