Keramik

Keramikbraut er tveggja ára nám þar sem þú lærir að vinna með leir, gifs og postulín og öðlast fræðilega þekkingu á faginu. Rík áhersla er lögð á hugmyndavinnu og nemendur eru hvattir til fjölbreyttra rannsókna og tilrauna með miðilinn.

Hér er hægt að sjá kynningarmyndband fyrir keramikbrautina.

Keramikbraut er einnig á Instagram.

Inntökuskilyrði er stúdentspróf af listnámsbraut eða sambærilegt nám. Auk þess skila umsækjendur inn skissubókum og möppu með sýnishornum af eigin verkum og eru ennfremur kallaðir í viðtal við inntökunefnd.

Tekið verður næst við umsóknum um nám á keramikbraut vorið 2022 fyrir skólaárið 2022-2023. Einungis einn hópur er við nám á hverjum tíma. Nýir nemendur eru þar af leiðandi fyrst og fremst teknir inn annað hvert ár. Áhugasömum er þó bent á að hafa samband við deildarstjóra sem annast viðkomandi námsbraut sem skoðar hvert einstakt tilvik í ljósi fyrra náms og reynslu.

Nám á brautinni er að stærstum hluta verklegt en fræðilegt nám er u.þ.b. fjórðungur. Til fræðilegra áfanga teljast fagsaga, hönnunarsaga, listasaga og heimspeki auk viðskiptaáfanga og málstofu. Málstofa er vettvangur fyrir margvíslega umræðu þar sem nemendur skoða verk sín í samhengi við samfélagið og listheiminn. Farið er á söfn og sýningar, í heimsóknir á vinnustofur eða fyrirtæki og fyrirlesarar úr atvinnulífinu fengnir í heimsókn.

Einn af áföngum keramikbrautar er námsferð til Evrópu þar sem nemendur kynnast ýmsum náms- og starfsmöguleikum. Ferðirnar eru styrktar af Erasmus+ menntaáætlun Evrópusambandsins.

Verklegir áfangar eru flestir kenndir í samfelldum lotum. Lifandi samræða um verkefni nemenda er ríkur þáttur í öllum verklegum áföngum. Áhersla er lögð á samvinnu og skólinn útvegar nemendum gjarnan raunveruleg verkefni sem byggja á samstarfi við einstaklinga utan skólans, fyrirtæki og stofnanir.

Nám á keramikbraut er 120 einingar. Unnið er með ákveðna grunnþætti á hverri önn um sig; jarðleir og handmótun, tilraunir með efni og aðferðir, steinleir og rennslu og aðferðir til framleiðslu. Viðfangsefnið er skoðað frá ýmsum sjónarhornum og nýjar leiðir rannsakaðar. Fræðimenn og fagfólk er fengið til að varpa ólíku ljósi á námsefnið.

Nánari upplýsingar um nám á keramikbraut má finna í námsbrautarlýsingu.

Deildarstjóri keramikbrautar er Sigurlína Margrét Osuala.

Skólagjöld fyrir námsárið 2021-2022 eru 460.000,- kr.